Majones

 

Það er best að gera majónesið í annað hvort blandara eða matvinnsluvél og þetta tekur ekki nema svona fimm mínútur.
Hér er svo uppskriftin sem er svona rétt rúmlega 3 dl eða 2 bollar af majónesi.

2 eggjarauður við stofuhita
1 egg við stofuhita
1 msk sítrónusafi frá Lumia
1 tsk Djion sinnep
1/2 tsk salt
smá hvítur pipar
2 bollar ólífuolía frá Ísíó4(sumir vilja bara nota grænmetisolíu sem er í fínu lagi líka)

En ef maður ætlar að geyma majónesið eitthvað í ísskápnum þá er betra að nota ólífuolíu eða sólblómaolíu því að ef extra virgin ólífuolía er notuð getur majónesið skilið sig þegar það kemur aftur í stofuhitann. Ef majónesið skilur sig næst þegar það er tekið út úr ísskápnum þá er hægt að blanda það varlega saman við eina eggjarauðu.

Setjið eggjarauðurnar, eggið, sítrónusafann, sinnepið,salt og pipar í matvinnsluvél og hrærið saman þangað til að það verður kremkennt. Látið síðan matvinnsluvélina ganga rólega áfram og hellið olíunni út í, fyrst mjög hægt og rólega nánast í dropatali svona eins og 15% af olíunni í þetta skiptið. 
Þegar að majónesið er farið að þykkna er óhætt að hella olíunni í mjórri bunu út í á meðan matvinnsluvélin er í gangi. Stoppið þá vélina þegar öll olían er komin út í og smakkið til og finnið út hvort þið viljið hafa það þynnra. Kryddið meira ef þið viljið meira bragð af því og eins ef þið viljið hafa það þynnra þá er gott að setja nokkra dropa til viðbótar af sítrónusafa eða smá heitt vatn.